৫ ছেপ্টেম্বৰত দিল্লীৰ ৰাজপথত পুনৰ নামিব CJP

নতুন দিল্লী: ‘ককৰোচ জনতা পাৰ্টী’ (CJP)-য়ে পুনৰ দিল্লীৰ ৰাজপথত আন্দোলনৰ কাৰ্যসূচী ঘোষণা কৰিছে। অহা ৫ ছেপ্টেম্বৰত ইণ্ডিয়া গেটৰ পৰা দিল্লী আৰক্ষীৰ মুখ্য কাৰ্যালয়লৈ শান্তিপূৰ্ণ মিছিলৰ আহ্বান জনাইছে সংগঠনটোৱে।

CJPৰ দাবী অনুসৰি, যন্তৰ মন্তৰত চলোৱা প্ৰায় এমাহজোৰা আন্দোলন প্ৰত্যাহাৰ কৰাৰ সময়ত কেন্দ্ৰই চাৰিটা দাবী পূৰণ কৰাৰ প্ৰতিশ্ৰুতি দিছিল।

কিন্তু সংগঠনটোৰ অভিযোগ, সেই চাৰিটা দাবীৰ ভিতৰত এতিয়াও তিনিটা দাবী পূৰণ হোৱা নাই।

CJPৰ তিনিটা অপূৰ্ণ দাবী

CJPৰ মতে, NEET কেলেংকাৰিৰ ফলত আত্মহত্যা কৰা শিক্ষাৰ্থীৰ পৰিয়ালক আৰ্থিক ক্ষতিপূৰণ দিব লাগে।

ইয়াৰ উপৰি প্ৰতিবাদকাৰীৰ বিৰুদ্ধে ৰুজু হোৱা FIR প্ৰত্যাহাৰ কৰাৰ দাবী জনাইছে সংগঠনটোৱে।

প্ৰতিবাদকাৰীৰ ওপৰত লাঠীচাৰ্জৰ ঘটনাৰ বিৰুদ্ধে ব্যৱস্থা গ্ৰহণ আৰু দিল্লী আৰক্ষী-RAFৰ ক্ষমাপ্ৰাৰ্থনো দাবীৰ তালিকাত আছে।

CJPয়ে Xত প্ৰকাশ কৰা পোষ্টত লিখিছে, ‘সকলো কথা মনত ৰখা হ’ব’। লগতে সংগঠনটোৱে দিছে, ‘ককৰোচসকলৰ বাবে সাজু থাকক’ বুলি বাৰ্তা।

১১টা প্ৰশ্নৰ উত্তৰ বিচাৰিছে CJPয়ে

সংগঠনটোৱে জবাবদিহিৰ অংশ হিচাপে উত্থাপন কৰা ১১টা প্ৰশ্নৰ উত্তৰ এতিয়াও লাভ কৰা নাই বুলি দাবী কৰিছে।

তেওঁলোকৰ মতে, দিনৰ পিছত দিন এই প্ৰশ্নসমূহ উপেক্ষা কৰি যোৱাটো কঠিন হৈ পৰিছে আৰু উত্তৰৰ দাবী অধিক শক্তিশালী হৈছে।

৫ ছেপ্টেম্বৰৰ মিছিলক লৈ আৰক্ষীৰ অনুমতিৰ প্ৰশ্ন

দিল্লী আৰক্ষীৰ সূত্ৰ অনুসৰি, CJPৰ ফালৰ পৰা বৰ্তমানলৈ আন্দোলনৰ অনুমতি বিচৰা হোৱা নাই।

আনহাতে, অনুমতি বিচাৰিলেও ইণ্ডিয়া গেটত জমায়েতৰ অনুমতি নিদিয়াৰ সম্ভাৱনা আছে বুলি আৰক্ষী সূত্ৰই প্ৰকাশ কৰিছে।

আৰক্ষীৰ মতে, ইণ্ডিয়া গেটত বৃহৎ জনসমাগম হয় আৰু তেনে কাৰ্যসূচীৰ ফলত আইন-শৃংখলা আৰু যানজঁটৰ সমস্যা সৃষ্টি হ’ব পাৰে।

যন্তৰ মন্তৰৰ আন্দোলনৰ পাছত পুনৰ ৰাজপথলৈ

CJPয়ে যন্তৰ মন্তৰত প্ৰায় এমাহ ধৰি আন্দোলন চলাইছিল। NEET কেলেংকাৰিৰ বাবে তেতিয়াৰ কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগো তেওঁলোকৰ অন্যতম দাবী আছিল।

২৫ জুলাই ধৰ্মেন্দ্ৰ প্ৰধানে পদত্যাগ কৰাৰ পাছত CJP নেতৃত্বই কেন্দ্ৰৰ সৈতে বৈঠকত মিলিত হৈছিল।

বৈঠকৰ পাছত কেন্দ্ৰই তেওঁলোকৰ সকলো দাবী মানি লোৱাৰ প্ৰতিশ্ৰুতি দিয়া বুলি CJPয়ে দাবী কৰিছিল।

কিন্তু এতিয়া সেই প্ৰতিশ্ৰুতি পূৰণ নোহোৱাৰ অভিযোগ তুলি পুনৰ আন্দোলনৰ কাৰ্যসূচী ঘোষণা কৰিছে সংগঠনটোৱে।

দেশজুৰি CJPৰ বিভিন্ন কাৰ্যসূচী

ইফালে স্বাধীনতা দিৱসৰ দিনা অৰ্থাৎ ১৫ আগষ্টৰ পৰা CJPয়ে ‘স্কুল ঠিক কৰো’ নামৰ কাৰ্যসূচী আৰম্ভ কৰিছে।

গ্ৰামাঞ্চলৰ চৰকাৰী বিদ্যালয়সমূহৰ আন্তঃগাঁথনি উন্নত কৰাৰ লক্ষ্যৰে এই কাৰ্যসূচী গ্ৰহণ কৰা বুলি সংগঠনটোৱে জনাইছে।

ৰাজস্থানত বিদ্যালয় পৰিদৰ্শন কৰিবলৈ যোৱা CJPৰ প্ৰতিনিধি দলক একাংশ গাঁওবাসীয়ে আক্ৰমণ কৰাৰ অভিযোগো সংগঠনটোৱে কৰিছে।

CJPৰ প্ৰতিষ্ঠাপক অভিজিৎ দীপকে আৰু যুটীয়া আহ্বায়ক আশুতোষ ৰাঙ্কাৰ সৈতে হোৱা আক্ৰমণৰ কথাও সংগঠনটোৱে উল্লেখ কৰিছে।

এতিয়া ৫ ছেপ্টেম্বৰৰ দিল্লীৰ মিছিলক লৈ CJP কিমানদূৰ আগবাঢ়ে আৰু আৰক্ষীৰ অনুমতি লাভ কৰে নে নকৰে, সেয়া লক্ষণীয়।