মুম্বাই: ৰাখীবন্ধনৰ বিজ্ঞাপনক কেন্দ্ৰ কৰি অভিনেত্ৰী কৃতি সেননক লৈ সৃষ্টি হোৱা বিতৰ্কই নতুন মোড় লৈছে।
বিতৰ্কৰ মাজতে কৃতি সেননৰ সেই ৰাখীবন্ধন বিশেষ বিজ্ঞাপনটো সকলো মাধ্যমৰ পৰা আঁতৰোৱাৰ সিদ্ধান্ত লৈছে গহনা বিপণন সংস্থাটোৱে।
বিজ্ঞাপনটোত কৃতি সেননক ব্ৰালেট ধাঁচৰ টপ আৰু স্কাৰ্ট পৰিহিত অৱস্থাত দেখা গৈছিল।
সমাজৰ একাংশই এই পোছাক ৰাখীবন্ধনৰ দৰে উৎসৱৰ বাবে উপযুক্ত নহয় বুলি অভিযোগ কৰিছিল।
কঙ্গনা ৰনৌতৰ সমালোচনা
বিজ্ঞাপনটোক লৈ সমাজমাধ্যমত বিতৰ্ক চলি থকাৰ মাজতে বিজেপি সাংসদ কঙ্গনা ৰনৌতেও কৃতি সেননৰ পোছাকক সমালোচনা কৰিছিল।
কৃতি সেননে পাল্টা প্ৰতিক্ৰিয়া প্ৰকাশ কৰি কয় যে এগৰাকী নাৰীৰ সংস্কৃতি আৰু পৰম্পৰাৰ প্ৰতি সন্মান কেৱল পোছাকৰ জৰিয়তে বিচাৰ কৰিব নালাগে।
তেওঁৰ মতে, সংস্কৃতি আৰু পৰম্পৰা মানুহৰ হৃদয়ত থাকে, পোছাকৰ গলাৰ কাটত নহয়।
ৰাহুল গান্ধীৰ সমৰ্থন
বিতৰ্কৰ মাজতে কৃতি সেননৰ সমৰ্থনত সামাজিক মাধ্যমত পোষ্ট কৰে কংগ্ৰেছ নেতা ৰাহুল গান্ধীয়ে।
ৰাহুল গান্ধীয়ে এগৰাকী মহিলাই কি পিন্ধিব, কি কৰিব আৰু ক’লৈ যাব, সেয়া তেওঁৰ ব্যক্তিগত পছন্দ বুলি মন্তব্য কৰে।
তেওঁ মহিলাসকলক স্বাধীনভাৱে চলা-ফুৰাৰ বাবে ট্ৰ’ল কৰা বন্ধ কৰিবলৈ আহ্বান জনায়।
ৰাহুল গান্ধীৰ এই মন্তব্যক লৈও কঙ্গনা ৰনৌতে প্ৰতিক্ৰিয়া প্ৰকাশ কৰিছিল।
পোহনীয়া কুকুৰক ৰাখী পিন্ধোৱাক লৈও আপত্তি
বিজ্ঞাপনটোত কৃতি সেননে মৰমেৰে পোহনীয়া কুকুৰ এটাক ৰাখী পিন্ধোৱা দৃশ্যও আছিল।
এই দৃশ্যক লৈও সমাজমাধ্যমৰ একাংশ ব্যৱহাৰকাৰীয়ে আপত্তি প্ৰকাশ কৰিছিল।
তেওঁলোকৰ অভিযোগ আছিল, বিজ্ঞাপনটোৱে ৰাখীবন্ধনৰ পৰম্পৰাগত ভাবনাক উপযুক্তভাৱে প্ৰতিনিধিত্ব কৰা নাই।
গহনা সংস্থাৰ বিজ্ঞাপন আঁতৰোৱাৰ সিদ্ধান্ত
বিতৰ্কৰ মাজতে গহনা বিপণন সংস্থাটোৱে এক বিবৃতি প্ৰকাশ কৰি ভাৰতীয় সংস্কৃতি, পৰম্পৰা আৰু উৎসৱৰ প্ৰতি তেওঁলোকৰ গভীৰ সন্মান থকাৰ কথা প্ৰকাশ কৰে।
সংস্থাটোৱে কয় যে বিজ্ঞাপনৰ উদ্দেশ্য আছিল উৎসৱৰ আনন্দৰ সৈতে পৰিয়াল আৰু পোহনীয়া জন্তুৰ প্ৰতি থকা ভালপোৱাক উদ্যাপন কৰা।
কিন্তু বিজ্ঞাপনে সমাজৰ কোনো অংশৰ অনুভূতিত আঘাত হানি থাকিলে সেয়া তেওঁলোকৰ উদ্দেশ্য নাছিল বুলি সংস্থাটোৱে স্পষ্ট কৰে।
সন্মানৰ কথা মনত ৰাখি সকলো মাধ্যমৰ পৰা বিজ্ঞাপনটো আঁতৰাই দিয়াৰ সিদ্ধান্ত লোৱা হৈছে বুলি সংস্থাটোৱে ঘোষণা কৰে।
