শ্বিলঙৰ আছাম ৰেজিমেণ্টেল চেণ্টাৰত কাইলৈ বিশেষ কাৰ্যসূচীত অংশগ্ৰহণ কৰিব অসমৰ মুখ্যমন্ত্ৰী ড° হিমন্ত বিশ্ব শৰ্মাই। চেণ্টাৰৰ বিশেষ আমন্ত্ৰণত মুখ্যমন্ত্ৰীগৰাকীয়ে যুদ্ধ স্মাৰকত বীৰ শ্বহীদসকললৈ শ্ৰদ্ধাঞ্জলি জ্ঞাপন কৰাৰ লগতে সেনাৰ সমৰ কৌশল প্ৰদৰ্শন প্ৰত্যক্ষ কৰিব।
বিশেষ আমন্ত্ৰণত কাইলৈ শ্বিলঙৰ আছাম ৰেজিমেণ্টেল চেণ্টাৰত উপস্থিত হৈ মুখ্যমন্ত্ৰী ড° হিমন্ত বিশ্ব শৰ্মাই কেইবাটাও কাৰ্যসূচীত অংশগ্ৰহণ কৰিব।
ভ্ৰমণৰ আৰম্ভণিতে মুখ্যমন্ত্ৰীগৰাকীয়ে যুদ্ধ স্মাৰকত উপস্থিত হৈ দেশৰ বাবে প্ৰাণ আহুতি দিয়া বীৰ শ্বহীদসকললৈ শ্ৰদ্ধাঞ্জলি জ্ঞাপন কৰিব।
ইয়াৰ পিছতে তেওঁ চেণ্টাৰত অনুষ্ঠিত সমৰ কৌশল আৰু যুদ্ধ-প্ৰস্তুতিৰ প্ৰদৰ্শন প্ৰত্যক্ষ কৰিব। সেনা জোৱানসকলৰ প্ৰশিক্ষণ, দক্ষতা আৰু সমৰ-প্ৰস্তুতিৰ বিভিন্ন দিশ এই প্ৰদৰ্শনৰ জৰিয়তে উপস্থাপন কৰা হ’ব।
মুখ্যমন্ত্ৰীৰ কাৰ্যসূচীৰ আন এক গুৰুত্বপূৰ্ণ অংশ হ’ব সেনা জোৱান আৰু সামৰিক পৰিয়ালবৰ্গৰ সৈতে মত-বিনিময়। এই অনুষ্ঠানত মুখ্যমন্ত্ৰীগৰাকীয়ে জোৱানসকলৰ সৈতে পোনপটীয়াকৈ মত বিনিময় কৰাৰ লগতে তেওঁলোকৰ পৰিয়ালবৰ্গৰ সৈতেও বাৰ্তালাপ কৰিব।
আছাম ৰেজিমেণ্টেল চেণ্টাৰৰ এই বিশেষ আমন্ত্ৰণত মুখ্যমন্ত্ৰীৰ উপস্থিতিয়ে শ্বহীদসকলৰ প্ৰতি সন্মান, সেনা জোৱানসকলৰ সেৱা আৰু সামৰিক পৰিয়ালবৰ্গৰ অৱদানৰ প্ৰতি স্বীকৃতি প্ৰকাশৰ এক বিশেষ সুযোগ হিচাপে বিবেচিত হৈছে।
