তিনিচুকীয়াঃ তিনিচুকীয়া জিলাৰ ডুমডুমাত আলফা(স্বা)ৰ নাম ব্যৱহাৰ কৰি প্ৰায় ১০গৰাকী ব্যৱসায়ীলৈ ধন দাবীৰ পত্ৰ প্ৰেৰণ কৰাৰ ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে। জানিব পৰা মতে, ডুমডুমাৰ কেইবাগৰাকী ব্যৱসায়ীলৈ প্ৰেৰণ কৰা পত্ৰসমূহত আলফা(স্বা)ৰ বিত্ত সচিব লেফটেনেণ্ট জেনেৰেল মাইকেল অসম আৰু সহকাৰী বিত্ত সচিব মেজৰ অভিমন্যু অসমৰ নাম উল্লেখ কৰা হৈছে। পত্ৰসমূহত তেওঁলোকৰ নামত স্বাক্ষৰো থকা বুলি জানিব পৰা গৈছে। এই পত্ৰ লাভ কৰাৰ পাছতে আতংকিত ব্যৱসায়ীসকলে বিষয়টো আৰক্ষীক অৱগত কৰে।
আৰক্ষীৰ তদন্ত আৰম্ভ
ঘটনাৰ খবৰ লাভ কৰাৰ পাছতে আৰক্ষীয়ে অভিযোগ গ্ৰহণ কৰি তদন্ত আৰম্ভ কৰিছে। ধন দাবীৰ পত্ৰসমূহ ক’ৰ পৰা প্ৰেৰণ কৰা হৈছিল আৰু ইয়াৰ আঁৰত কোন জড়িত আছে, সেই বিষয়ে আৰক্ষীয়ে অনুসন্ধান চলাইছে। পত্ৰসমূহ প্ৰকৃত নে জাল, সেই বিষয়টোও তদন্তৰ জৰিয়তে নিৰূপণ কৰাৰ চেষ্টা চলোৱা হৈছে।
আলফা(স্বা)ৰ নাম-স্বাক্ষৰ অপব্যৱহাৰৰ অভিযোগ
ইফালে, এই ধন দাবীৰ ঘটনাৰ সৈতে আলফা(স্বা)ৰ কোনো সম্পৰ্ক নাই বুলি সংগঠনটোৱে স্পষ্ট কৰি দিছে। সংগঠনটোৰ এক বিবৃতি অনুসৰি, ডুমডুমাৰ কোনো ব্যৱসায়ী বা আন কোনো ব্যক্তিলৈ আলফা(স্বা)ৰ ফালৰ পৰা ধন দাবীৰ পত্ৰ প্ৰেৰণ কৰা হোৱা নাই। সংগঠনটোৱে অভিযোগ কৰিছে যে কোনো অজ্ঞাত গোটে তেওঁলোকৰ বিত্ত সচিব আৰু সহকাৰী বিত্ত সচিবৰ নাম আৰু স্বাক্ষৰ জাল কৰি ধন দাবীৰ পত্ৰ প্ৰেৰণ কৰিছে।
ব্যৱসায়ীসকলক সতৰ্ক কৰিলে সংগঠনটোৱে
আলফা(স্বা)ই ডুমডুমাৰ ব্যৱসায়ীসকলক এনে ধৰণৰ ধন দাবীৰ পত্ৰ বা বাৰ্তা লাভ কৰিলে সতৰ্ক হৈ থাকিবলৈ আহ্বান জনাইছে। লগতে এনে কোনো অজ্ঞাত গোটৰ সৈতে সহযোগ নকৰিবলৈও সংগঠনটোৱে ব্যৱসায়ীসকলক আহ্বান জনাইছে। ইফালে, ঘটনাটোক লৈ ব্যৱসায়ীসকলৰ মাজত উদ্বেগ বৃদ্ধি পাইছে। আৰক্ষীৰ তদন্ত আগবঢ়াৰ লগে লগে ধন দাবীৰ এই জাল পত্ৰৰ আঁৰত কোন আছে, সেই ৰহস্য পোহৰলৈ অহাৰ সম্ভাৱনা আছে।
