নতুন দিল্লী: মৃত প্ৰাক্তন কংগ্ৰেছ সাংসদ সজ্জন কুমাৰৰ বাসগৃহলৈ গৈ পৰিয়ালক সমবেদনা জনোৱাক লৈ বিপদত পৰিছে বিজেপিৰ তিনিগৰাকী সাংসদ। ইতিমধ্যে সাংসদ তিনিগৰাকীক দলৰ ৰাষ্ট্ৰীয় সভাপতি নীতিন নবীনে তলব কৰা বুলি জানিব পৰা গৈছে।
তলব কৰা সাংসদকেইগৰাকী হৈছে কমলাজিৎ শ্বেহৰাৱত, ৰামবীৰ সিং বিধুৰী আৰু যোগেন্দ্ৰ চান্দোলিয়া। সজ্জন কুমাৰৰ মৃত্যুৰ পিছত পৰিয়ালক সমবেদনা জনোৱাৰ উদ্দেশ্যে তিনিওগৰাকী বিজেপি সাংসদে তেওঁৰ বাসগৃহলৈ গৈছিল।
সজ্জন কুমাৰৰ মৃত্যুৰ পিছতেই সৃষ্টি হয় বিতৰ্ক
২০ আগষ্টত ৮০ বছৰ বয়সত মৃত্যু হৈছিল সজ্জন কুমাৰৰ। তেওঁৰ মৃত্যুৰ পিছত পৰিয়ালক সমবেদনা জনাবলৈ বিজেপিৰ তিনিগৰাকী সাংসদ তেওঁৰ বাসগৃহত উপস্থিত হয়।
কিন্তু ১৯৮৪ চনৰ শিখ হত্যাকাণ্ডৰ সৈতে জড়িত দুটা পৃথক গোচৰত যাৱজ্জীৱন কাৰাদণ্ড লাভ কৰা সজ্জন কুমাৰৰ বাসগৃহলৈ বিজেপিৰ সাংসদসকল যোৱাক লৈ দলৰ ভিতৰতে প্ৰতিক্ৰিয়াৰ সৃষ্টি হয়।
অভিযোগ অনুসৰি, সাংসদ তিনিগৰাকীৰ এই পদক্ষেপে দলীয় নিৰ্দেশনাৰ সৈতে সংঘাত সৃষ্টি কৰিছিল। ইয়াৰ পিছতেই বিজেপিৰ ৰাষ্ট্ৰীয় সভাপতি নীতিন নবীনে তেওঁলোকক তলব কৰা বুলি জানিব পৰা গৈছে।
পাঞ্জাব নিৰ্বাচনৰ পূৰ্বে বিজেপিক অস্বস্তিত পেলালে ঘটনাই
পাঞ্জাব বিধানসভা নিৰ্বাচনৰ পূৰ্বে বিজেপিৰ তিনিগৰাকী সাংসদৰ এই পদক্ষেপে দলটোক ৰাজনৈতিকভাৱে অস্বস্তিত পেলোৱা বুলি চৰ্চা চলিছে।
বিশেষকৈ ১৯৮৪ চনৰ শিখ হত্যাকাণ্ডৰ ভুক্তভোগীসকলক ন্যায় দিয়াৰ বিষয়টো বিজেপিয়ে দীৰ্ঘদিন ধৰি উত্থাপন কৰি অহাৰ সময়তে সজ্জন কুমাৰৰ বাসগৃহলৈ দলৰ সাংসদসকল যোৱাক লৈ প্ৰশ্ন উত্থাপিত হৈছে।
এইচ এছ ফুলকাৰ তীব্ৰ প্ৰতিক্ৰিয়া
শেহতীয়াকৈ বিজেপিত যোগ দিয়া আৰু ১৯৮৪ চনৰ শিখ হত্যাকাণ্ডৰ ভুক্তভোগীসকলৰ আইনী যুঁজৰ অন্যতম গুৰুত্বপূৰ্ণ মুখ এইচ এছ ফুলকাই সাংসদ তিনিগৰাকীৰ কাৰ্যৰ তীব্ৰ নিন্দা কৰিছে।
ফুলকাই কয়—
“গণহত্যাকাৰী সজ্জন কুমাৰৰ গৃহলৈ গৈ সমবেদনা জনোৱা কাৰ্যক মই ধিক্কাৰ জনাইছোঁ। য’ত বিজেপিয়ে সদায় ১৯৮৪ৰ ভুক্তভোগীসকলক ন্যায় দিয়াবলৈ যুঁজি আহিছে, তাত এনে কাৰ্য কোনো কাৰণতে গ্ৰহণযোগ্য নহয়।”
ফুলকাৰ এই মন্তব্যৰ পিছত বিষয়টোৱে অধিক ৰাজনৈতিক গুৰুত্ব লাভ কৰিছে।
বিজেপিৰ স্পষ্টীকৰণ
ইফালে, বিজেপিৰ ৰাষ্ট্ৰীয় মুখপাত্ৰ আৰ পি সিঙে সাংসদ তিনিগৰাকীৰ পক্ষত দলৰ স্থিতি স্পষ্ট কৰিছে।
তেওঁ কয় যে সাংসদ তিনিগৰাকীয়ে সজ্জন কুমাৰৰ বাসগৃহলৈ যোৱাটো তেওঁলোকৰ সম্পূৰ্ণ ব্যক্তিগত সিদ্ধান্ত আছিল। তেওঁলোক বিজেপি দলৰ প্ৰতিনিধি হিচাপে তাত উপস্থিত হোৱা নাছিল বুলিও আৰ পি সিঙে স্পষ্ট কৰি দিয়ে।
এতিয়া প্ৰশ্ন হৈছে—দলীয় নিৰ্দেশনা অমান্য কৰাৰ অভিযোগত তলব কৰা বিজেপিৰ এই তিনিগৰাকী সাংসদৰ বিৰুদ্ধে দলীয় নেতৃত্বই পৰৱৰ্তী সময়ত কি সিদ্ধান্ত গ্ৰহণ কৰে। পাঞ্জাবৰ ৰাজনীতিতো এই ঘটনাৰ প্ৰভাৱ পৰে নে নপৰে, সেয়া লক্ষণীয় হ’ব।
