কালাইগাঁৱৰ দেৰুৱা গাঁৱৰ বাসিন্দা উমাকান্ত শৰণীয়াৰ চিকিৎসাৰ বাবে আৰ্থিক সহায়ৰ আবেদন জনাইছে তেওঁৰ পৰিয়ালে। BTC-ৰ Hagrama Mohilaryক পৰিয়ালটোক সহায় কৰাৰ অনুৰোধ জনোৱা হৈছে।
পৰিয়ালৰ ভাষ্য অনুসৰি, উমাকান্ত শৰণীয়া প্ৰায় চাৰি মাহ ধৰি অসুস্থ। প্ৰথমে তেওঁক GMCHত ভৰ্তি কৰোৱা হৈছিল। তাত ৰোগ ধৰা নপৰাত পাছত AIIMSলৈ লৈ যোৱা হয় বুলি পৰিয়ালে জনাইছে।
AIIMSতো ৰোগ নিৰ্ণয় নহ’ল বুলি দাবী কৰি পৰিয়ালে কয়, পিছত নাৰায়ণা হাস্পতালত ভৰ্তি কৰোৱাৰ পাছত তেওঁ জটিল ৰোগত আক্ৰান্ত বুলি ধৰা পৰে। চিকিৎসাৰ খৰচ বহন কৰাটো পৰিয়ালটোৰ পক্ষে সম্ভৱ নহয় বুলিও তেওঁলোকে উল্লেখ কৰিছে।
পৰিয়ালৰ দাবী, উমাকান্ত শৰণীয়া চাৰিদিন ধৰি ভেণ্টিলেটৰত আছে। তেওঁৰ চিকিৎসাৰ বাবে ওচৰ-চুবুৰীয়াই সহায় আগবঢ়াইছে যদিও সেই সহায় যথেষ্ট নহয় বুলি পৰিয়ালটোৱে জনাইছে।
দিনমজুৰিৰে ঘৰ চলোৱা উমাকান্ত শৰণীয়াই কাম কৰিব নোৱাৰাত পৰিয়ালটো অধিক সংকটত পৰিছে বুলি আবেদনত উল্লেখ কৰা হৈছে। তেওঁ BPFৰ কৰ্মকৰ্তা আছিল বুলিও পৰিয়ালে দাবী কৰিছে।
চিকিৎসাৰ খৰচত সহায় আগবঢ়াই উমাকান্ত শৰণীয়াক সুস্থ কৰি ঘৰলৈ উভতাই আনিবলৈ সহায় কৰাৰ বাবে Hagrama Mohilaryৰ প্ৰতি পৰিয়ালটোৱে আহ্বান জনাইছে।
