সুপ্ৰিম কোৰ্টৰ এক আদেশৰ পাছত প্ৰতিবাদত অংশ লোৱাৰ বাবে ভৱিষ্যতে কোনো যুৱক, শিক্ষাৰ্থী বা প্ৰতিবাদকাৰীৰ বিৰুদ্ধে ব্যৱস্থা লোৱা নহ’ব বুলি সৌৰভ দাসে দাবী কৰিছে। তেওঁৰ মতে, চৰকাৰে এই কথা শপতনামাত উল্লেখ কৰিছে আৰু কোৰ্টেও সেয়া নথিভুক্ত কৰিছে।
দাসে কয়, এই ব্যৱস্থাই দেশৰ যুৱসকলৰ বাবে ভৱিষ্যতৰ নিশ্চয়তা দিয়ে। প্ৰতিবাদৰ বাবে FIR বা অন্য কোনো ব্যৱস্থা নহ’ব বুলিও তেওঁ দাবী কৰে।
তেওঁৰ ভাষ্য অনুসৰি, দিল্লী আৰক্ষীয়ে ফেচিয়েল ৰেকগনিশন প্ৰযুক্তিৰ জৰিয়তে প্ৰতিবাদস্থলীত ২৮০০ জন ‘হাৰ্ডেন্ড ক্ৰিমিনেল’ চিনাক্ত কৰাৰ আশংকা প্ৰকাশ কৰিছিল। এই লোকসকলৰ বিৰুদ্ধে দিল্লীত পৃথক আৰু নতুন FIR ৰুজু কৰি তদন্ত চলি থাকিব বুলি সুপ্ৰিম কোৰ্টৰ আদেশত উল্লেখ আছে বুলি দাসে কয়।
দাসে লগতে কয়, চিনাক্ত লোকসকলে যদি ধৰ্ষণ, হত্যা আদি গুৰুতৰ অপৰাধ সংঘটিত কৰে, তেন্তে তদন্ত কৰি আইনী ব্যৱস্থা ল’ব লাগে। কিন্তু কেৱল প্ৰতিবাদত উপস্থিত থকাৰ ভিত্তিত সকলো অংশগ্ৰহণকাৰীৰ বিৰুদ্ধে ব্যৱস্থা লোৱাটো সমীচীন নহয় বুলি তেওঁ মত প্ৰকাশ কৰে।
আনহাতে, ক্ষতিগ্ৰস্ত পৰিয়ালসমূহক ৯০ দিনৰ ভিতৰত ক্ষতিপূৰণৰ ধন তেওঁলোকৰ বেংক একাউণ্টত জমা দিয়াৰ প্ৰতিশ্ৰুতি চৰকাৰে সুপ্ৰিম কোৰ্টত দিয়া বুলি দাসে দাবী কৰে। তেওঁৰ মতে, কোৰ্টে এই আশ্বাস গ্ৰহণ কৰি নিজৰ আদেশত অন্তৰ্ভুক্ত কৰিছে।
পৰিয়ালসমূহৰ সৈতে যোগাযোগ ৰাখি আৰ্থিক সহায় আৰু মানসিক সমৰ্থন আগবঢ়োৱাৰ চেষ্টা চলোৱা হৈছে বুলিও দাসে কয়। কোৰ্টৰ আদেশৰ পাছত ক্ষতিপূৰণ দিয়াৰ বিষয়টো এতিয়া বাধ্যতামূলক আদেশৰ ৰূপ লৈছে বুলি তেওঁ মন্তব্য কৰে।
