আজি দেশজুৰি বেংক কৰ্মচাৰীৰ ধৰ্মঘট!

সমগ্ৰ দেশতে ৫ দিনীয়া কৰ্মসপ্তাহ কাৰ্যকৰী কৰাৰ দাবীত বেংক কৰ্মচাৰীৰ ধৰ্মঘট অব্যাহত আছে।

United Forum of Bank Unions (UFBU)ৰ অধীনস্থ বেংক কৰ্মচাৰী আৰু বিষয়াসকলৰ সংগঠনসমূহৰ ধৰ্মঘটলৈ সমৰ্থন আগবঢ়াইছে UNI Global Union-এ।

৫ দিনীয়া কৰ্মসপ্তাহ কাৰ্যকৰী কৰাৰ দাবীত UFBUয়ে ১১ ছেপ্টেম্বৰত সৰ্বভাৰতীয় ধৰ্মঘটৰ আহ্বান জনাইছে। দাবী পূৰণ নোহ’লে ২৮ৰ পৰা ৩০ ছেপ্টেম্বৰলৈ তিনিদিনীয়া ধৰ্মঘট আৰু ২৬ অক্টোবৰৰ পৰা অনিৰ্দিষ্টকালীন ধৰ্মঘটৰ কাৰ্যসূচীও ঘোষণা কৰা হৈছে।

৫ দিনীয়া কৰ্মসপ্তাহেই মূল দাবী

বেংক সংগঠনসমূহৰ মূল দাবী হৈছে ৫ দিনীয়া কৰ্মসপ্তাহ কাৰ্যকৰী কৰা।

সংগঠনসমূহৰ মতে, ২০২৪ চনৰ ৮ মাৰ্চত স্বাক্ষৰিত Settlement আৰু Joint Noteত ৫ দিনীয়া কৰ্মসপ্তাহৰ বিষয়টো সন্মত হৈছিল।

ইয়াৰ লগতে চৰকাৰৰ Performance Linked Incentive বা PLI আঁচনিৰো বিৰোধিতা কৰিছে বেংক সংগঠনসমূহে।

সংগঠনসমূহে PLI আঁচনিখন একপক্ষীয় আৰু বৈষম্যমূলক বুলি অভিযোগ কৰি দ্বিপাক্ষিক আলোচনাৰ জৰিয়তে বিষয়টো পুনৰ বিবেচনাৰ দাবী জনাইছে।

আলোচনাত নহ’ল সমাধান

৫ দিনীয়া কৰ্মসপ্তাহৰ দাবীক লৈ ৮ আৰু ৯ ছেপ্টেম্বৰত Department of Financial Services, Indian Banks’ Association আৰু বেংক সংগঠনসমূহৰ মাজত আলোচনা অনুষ্ঠিত হৈছিল।

সংগঠনসমূহৰ মতে, আলোচনাত কোনো চুক্তি বা ৫ দিনীয়া কৰ্মসপ্তাহ কাৰ্যকৰী কৰাৰ নিৰ্দিষ্ট সময়সীমা নিৰ্ধাৰণ নহ’ল।

ইয়াৰ পাছতে পূৰ্বঘোষিত ধৰ্মঘটৰ কাৰ্যসূচী অব্যাহত ৰখাৰ সিদ্ধান্ত গ্ৰহণ কৰে বেংক সংগঠনসমূহে।

কৰ্মচাৰীৰ ওপৰত বৃদ্ধি পাইছে কামৰ বোজা

বেংক সংগঠনসমূহৰ নেতাসকলে কৰ্মচাৰীৰ সংখ্যা হ্ৰাস, ব্যৱসায়িক কাম বৃদ্ধি, নিয়ম-নীতি পালন আৰু কৰ্মদক্ষতাৰ লক্ষ্যৰ বাবে কামৰ বোজা বৃদ্ধি পোৱা বুলি দাবী কৰিছে।

৫ দিনীয়া কৰ্মসপ্তাহে কৰ্মচাৰীসকলৰ কাম আৰু ব্যক্তিগত জীৱনৰ মাজত ভাৰসাম্য ৰক্ষা কৰাত সহায় কৰিব বুলি সংগঠনসমূহে মত প্ৰকাশ কৰিছে।

UFBUৰ পক্ষত UNI Global Union

UNI Asia & Pacificৰ Regional Secretary ৰাজেন্দ্ৰ আচাৰ্যই ভাৰতৰ বেংক সংগঠনসমূহৰ সৈতে সংহতি প্ৰকাশ কৰি ৫ দিনীয়া বেংকিং ব্যৱস্থা কাৰ্যকৰী কৰাৰ দাবীক সমৰ্থন কৰে।

UNI Global Unionৰ মতে, ৫ দিনীয়া কৰ্মসপ্তাহৰ দাবী আন্তঃৰাষ্ট্ৰীয় শ্ৰম মানদণ্ড আৰু বিশ্বৰ বেংকিং ব্যৱস্থাৰ সৈতে সামঞ্জস্যপূৰ্ণ।