নতুন দিল্লীঃ BRICS সন্মিলনৰ পূৰ্বে শুকুৰবাৰে নতুন দিল্লীত বৈঠকত মিলিত হয় প্ৰধানমন্ত্ৰী নৰেন্দ্ৰ মোদী আৰু ৰাছিয়াৰ ৰাষ্ট্ৰপতি ভ্লাদিমিৰ পুটিন। বৈঠকত দুয়োগৰাকী নেতাই ভাৰত-ৰাছিয়াৰ বিশেষ কৌশলগত অংশীদাৰিত্ব অধিক শক্তিশালী কৰাৰ ক্ষেত্ৰত সহমত প্ৰকাশ কৰে।
দুয়োখন দেশৰ মাজৰ সম্পৰ্কৰ লগতে শক্তি আৰু প্ৰতিৰক্ষা খণ্ডকে ধৰি কেইবাটাও গুৰুত্বপূৰ্ণ বিষয় বৈঠকত আলোচনা কৰা হয়। পশ্চিম এছিয়া আৰু কৃষ্ণ সাগৰীয় অঞ্চলৰ সংঘাতৰ ফলত সামুদ্ৰিক বাণিজ্য আৰু ভাৰতীয় নাৱিকসকলৰ সুৰক্ষাত পৰা প্ৰভাৱ সন্দৰ্ভতো মত বিনিময় কৰে দুয়োগৰাকী নেতাই।
সংঘাতৰ সমাধানৰ বাবে আলোচনা আৰু কূটনীতিকে একমাত্ৰ পথ হিচাপে ভাৰতে গুৰুত্ব দি অহা বুলি বৈঠকত পুনৰ উল্লেখ কৰে প্ৰধানমন্ত্ৰী নৰেন্দ্ৰ মোদীয়ে। শান্তি প্ৰচেষ্টাত সহায় কৰিবলৈ ভাৰত সাজু বুলিও তেওঁ উল্লেখ কৰে।
ইফালে, ভাৰতৰ শক্তি সুৰক্ষাৰ ক্ষেত্ৰতো ৰাছিয়াৰ সৈতে সম্পৰ্ক গুৰুত্বপূৰ্ণ হৈ আছে। Reutersৰ মতে, ২০২৬ চনৰ জুলাইত ভাৰতৰ খাৰুৱা তেল আমদানিৰ ৫১ শতাংশ ৰাছিয়াৰ পৰা আহিছিল।
বৈঠকৰ সময়তে প্ৰধানমন্ত্ৰী মোদীয়ে ৰাষ্ট্ৰপতি পুটিনক তামিল ভাষাৰ প্ৰাচীন গ্ৰন্থ ‘তিৰুক্কুৰল’ৰ ৰাছিয়ান অনুবাদ উপহাৰ দিয়ে। গ্ৰন্থখনত নীতি, শাসন আৰু প্ৰেম সম্পৰ্কীয় ১,৩৩০টা দ্বিপদী আছে।
দুয়োগৰাকী নেতাই ভাৰত-ৰাছিয়া ঔদ্যোগিক মেলাও পৰিদৰ্শন কৰে। এই মেলাত ৰাছিয়াৰ প্ৰযুক্তি, কৃত্ৰিম বুদ্ধিমত্তা, বিমান পৰিবহণ, মহাকাশ, পাৰমাণৱিক বিজ্ঞান, গধুৰ অভিযান্ত্ৰিক আৰু বেংকিং খণ্ডৰ প্ৰদৰ্শনী আছিল।
ভাৰত আৰু ৰাছিয়াই ২০৩০ চনৰ ভিতৰত দ্বিপাক্ষিক বাণিজ্য ১০০ বিলিয়ন ডলাৰলৈ বৃদ্ধি কৰাৰ লক্ষ্য নিৰ্ধাৰণ কৰিছে। ২০২৪-২৫ বৰ্ষত দুয়োখন দেশৰ দ্বিপাক্ষিক বাণিজ্য প্ৰায় ৭০ বিলিয়ন ডলাৰ আছিল।
